Van loug en laand (24)
Doede Bruinsma's jeugdherinneringen
Verkeer.
Tegenswoordeg hef sikkom elkenaine op Haarpel n auto, moar zesteg joar leden mozzen luu op fietse stappen as zai woaraarns hen wollen. Allenneg rieke luu van aandere steden en n poar middenstanders haren n auto.
D'r kwam sikkom nooit n auto op Haarpel. Zölfs dokter Cremer kwam oet Vlagtwedde op fietse zaike mensen bezuiken. Was mozzen luu ook mit n auto in t lözze zaand?
Gelukkeg dat d'r fietsen waren. Veur dij fietsen mos belasten betoald worren, n rieksdoalder veur n joar. As bewies, dast belasten betoald hast, kreegst n kopern ploatje dij op fietse vastmoakt worren mos. Stief vaast, aans wör t ploatje stolen. Plietsie kontroleerde voak ofst wel n fietsploatje hast.
Luu dij aarm waren, konden n fietsploatje veur niks kriegen. Moar in zon ploatje zat dan n gat. Zo kon elkenaine zain, dast aarmlasteg wast. Moust tegenswoordeg doun!
As t tied was veur n nij fietsploatje hong ik n buzze aan t schoolhek woar luu heur olle fietsploatjes in doun konden. Dij stuurde ik dan noar ain of aandere laifdoadege instellen, want t koper was ja wat weerd.
Ast wied vot wolst, kon fietse mit tram of bus mit. Buschauffeur mos dan fietse op dak van bus tillen. Deurveur haar n bus van GADO n rek op dak.
Copyright © 2002 Doede Bruinsma (doedeb@cs.com)
Op-/aanmaarkens, aanvullens heb ik geern.
|Ol Graitje|Knoal|Dörsmesien|Kerdiet|Speulen|School|Dezembermoand|
|Winteroavend|Zwien|Poasken|Haarpel, niks in de reken|Bimbam|Noamen|
|Krisistied|Eerappelkraben|Masjesees|Scheuveln|Middenstand (I)|Middenstand (II)|
|Toene|Melk|Moderne techniek|Wild|Verkeer|
Lees ook ais de verhoalen van Doede Bruinsma op Dideldom.com
